گفت و گوی تیلیفونی وزیران خارجه افغانستان و تاجیکستان

محمدحنیف اتمر و وزیر خارجه تاجیکستان در یک تماس تیلیفونی در خصوص همکاری‌های دوجانبه و منطقه ای گفت و گو کردند. وزارت امور خارجه با نشر خبرنامه ای نوشت: محمد حنیف اتمر سرپرست وزارت امور خارجه جمهوری اسلامی افغانستان صبح امروز، با سراج الدین مهرالدین وزیر امور خارجه جمهوری تاجیکستان از طریق تیلیفون صحبت و تبادل نظر کرد. در ادامه این خبرنامه آمده است، که اتمر با قدردانی از حمایت جمهوری تاجیکستان از موقف جمهوری اسلامی افغانستان در روند صلح و آمادگی آن کشور برای میزبانی از نشست وزرای امور خارجه پروسه استانبول- قلب آسیا، اظهار داشت، جمهوری اسلامی افغانستان بر گسترش و تقویت هر چه بیشتر روابط میان دو کشور دوست و برادر باورمند بوده و برای تحقق این هدف از هیچ نوع تلاش دریغ نخواهد کرد. وزارت خارجه همچنین نوشته است، که سپس وزیر امور خارجه تاجیکستان، با تأکید بر حمایت آن کشور از موقف افغانستان در روند صلح به رهبری دولت جمهوری اسلامی افغانستان، حفظ نظام جمهوری اسلامی و دست آورد های ۱۹ سال پسین اطمینان داده، ابراز امیدواری کرد که جنگ و بحران طولانی در افغانستان با تلاش‌های مشترک دولت و مردم افغانستان و همکاری صادقانه کشورهای منطقه و جهان پایان یابد. در پایان این خبرنامه آمده است، که وزیران خارجه دو کشور با تأکید بر اشتراکات و پیوندهای عمیق دینی، فرهنگی و تاریخی میان افغانستان و تاجیکستان، در مورد نشست های دوجانبه و چندجانبه به شمول نشست وزیران خارجه پروسه استانبول- قلب آسیا که قرار است در آینده نزدیک به میزبانی تاجیکستان برگزار گردد و موضوعات مهم دیگر، از جمله امکان افزایش صادرات برق از تاجیکستان به افغانستان بحث و تبادل نظر کردند. هردو جانب توافق به عمل آوردند تا به هدف تقویت هرچه بیشتر همکاری ها رئیسان جمهور دو کشور در آینده نزدیک طی تماس تیلیفونی با هم صحبت خواهند کرد. یادآوری می کنیم، که چند روز پیش رئیس جمهور تاجیکستان با شهروندان افغانستان از آن طرف رودخانه آمو گفت و گو کرده بود و شهروندان افغانستان از رئیس جمهور تاجیکستان خواستار ساخت چند پروژه زیربنایی شده بودند.