تاجیکستان برای مهاجران احتمالی افغانستان اردوگاه ساخته است

کمیته حالت فوق‌العاده تاجیکستان خبر داده است که برای ورود احتمالی مهاجران افغانستان آمادگی گرفته و یک اردوگاه موقتی ایجاد کرده است. سخنگوی این کمیته می‌گوید که این اردوگاه با امکاناتی مثل آب و برق مجهز است.
حمیده یوسفی، سخنگوی کمیته حالت فوق العاده تاجیکستان گفت که این اردوگاه در بخش جنوبی این کشور در نزدیکی مرز افغانستان ساخته شده است.
خانم یوسفی گفت: «این اردوگاه ۶۴ خیمه دارد و با تمام تجهیزات مانند آب، برق، حمام و آشپزخانه مجهز است.»
سخنگوی کمیته حالت فوق العاده تاجیکستان افزود که این اردوگاه با حمایت کمیساریای عالی سازمان ملل متحد در امور پناهندگان، بنیاد آغاخان و یونیسف ایجاد شده است.
این مقام تاجیکستان توضیح داد که این اردوگاه برای آن مهاجران احتمالی افغانستان که در نتیجه وقوع رویدادهای طبیعی زیانمند شوند، در این منطقه مرزی ایجاد شده است.
سخنگوی کمیته حالت فوق العاده تاجیکستان گفت: «با ساخت این اردوگاه، در صورت وقوع حوادث طبیعی در آن سوی مرز ما امکان آن را داریم که شهروندان کشور همسایه را قبول نماییم.»
فعلاً کارهای ساختمانی در این اردوگاه به ویژه فعال سازی خدمات آب و برق ادامه دارد و تا کنون مهاجران در این اردوگاه به سر نمی برند.
شماری از دیپلومات‌های افغانستان از این اقدام تاجیکستان در شرایط کنونی افغانستان ستایش می‌کنند.
فهیم کوهدامنی، دیپلومات پیشن افغانستان در تاجیکستان می گوید که پیش از تحولات اخیر تاجیکستان میزبان حدود ده هزار پناهجویان افغان بود که اکثر ‌آنان در حومه شهر دوشنبه در «شهرک وحدت» و مناطق مرزی این کشور زندگی می کنند.
او می افزاید که پس از به قدرت رسیدن طالبان در افغانستان شمار مهاجران افغان در تاجیکستان بیشتر شده است، اما آمار مشخصی از تعداد آن‌ها وجود ندارد.
کوهدامنی درباره رفتار حکومت تاجیکستان با مهاجرین افغانستان می گوید: «سهولت هایی که در تاجیکستان برای مهاجران به ویژه در قسمت آموزش و پرورش، دانشگاه ها و صحت فراهم شده است، مانند خدمات برای شهروندان خود تاجیکستان است. حتی کسانی که از میان مهاجران در دانشگاه ها شامل می شوند، ۲۵ درصد تخفیف نسبت به شهروندان تاجیکستان برایشان در نظر گرفته می شود.»
با آنهم او می افزاید که زندگی مهاجرت دشورای های خود را دارد و کمیساریای عالی سازمان ملل متحد در تاجیکستان فعالیت چشمگیری ندارد تا به آن‌ها کمک کند.
کمیساریای عالی سازمان ملل متحد در امور پناهندگان نیز پیش از این از کشورهای همسایه و هم مرز افغانستان خواسته بود تا برای مهاجران افغان امکانات و سهولت ها را در کشورهایشان فراهم سازند.
با ورود طالبان به افغانستان در پانزدهم ماه اگست سال ۲۰۲۱ میلادی شماری از نیروهای نظامی حکومت پیشین نیز به کشورهای هم مرز با افغانستان به ویژه تاجیکستان و ازبیکستان فرار کرده بودند. مشخص نیست که فعلاً چه تعداد از مهاجران افغان در تاجیکستان به سر می‌برند.